DO`STLARGA ULASHING:

YouTube tomosha qilayotib, megabaytingizni 15 baravar tejash yo‘li bor! ?

Aksariyat biladiki, oqimli video tomosha qilishda internet-trafik ko‘p sarflanadi, ayniqsa, lavha yuqori sifatda olingan bo‘lsa. Agar internetingiz tezligi past yoki trafik miqdori cheklangan bo‘lsa, u holda pastroq sifatda ko‘rishga to‘g‘ri keladi.

Shuni inobatga olib, eng ommabop videoxosting – YouTube tarmog‘ida roliklarni turli sifatlarda tomosha qilish imkoni berilgan. Lekin ularning har birida qancha trafik sarflanishini hech o‘ylab ko‘rganmisiz?

Qisqacha aytganda, bir daqiqalik videolavhani turli sifat rejimlarida ko‘rganda, quyidagicha miqdorlarda trafik sarflanadi:

• 144p — 1,90 MB
• 240p — 2,70 MB
• 360p — 4,40 MB
• 480p — 7,70 MB
• 720p — 14,50 MB
• 1080p — 27,61 MB

Endi shundan kelib chiqib, biror rolikni har bir rejimda tomosha qilishga ketadigan trafikni hisoblash mumkin. Ya’ni, videolavha davomiyligi necha daqiqaga teng bo‘lsa, yuqoridagi ro‘yxatda ko‘rsatilgan megabaytni o‘sha songa ko‘paytirasiz.

Demak, YouTube’dagi roppa-rosa bir soatlik videoni o‘rtacha rezolyusiyada – 480p rejimida ko‘rish 460 megabayt “turadi”. Ayni shu lavhaning o‘zini Full HD formatida (1080p rejimida) tomosha qilsangiz esa – naq 1,7 gigabaytga “tushasiz”! Agarda uni eng past – 144p rejimida ko‘rsangiz, salkam o‘n besh baravarga kam – taxminan 114 megabayt trafik sarflanadi, xolos.

Videoni ko‘rish rejimini tanlash uchun YouTube mobil ilovasida yuqori o‘ng burchakdagi vertikal uch nuqta belgisini bosasiz. Ochilgan menyudan Quality (yoki “Качество”) bandini tanlab, kerakli aniqlik rejimini belgilab qo‘yasiz.

@kompyuter_bilimlari