Ҳаводаги чангни тозлаш мумкинми?
Полдаги чангни тозалаб олиш ҳаводаги майда зарраларни тозалашдан анча осонроқ экани барчага маълум. Фараз қилинг, узоқ сафарга кетиш учун ҳозирлик кўряпсиз. Қайтганингиздан сўнг тоза уйда ҳордиқ чиқариш мақсадида хонадонингизни ёғ тушса ялагудек қилиб тартибга келтирдингиз. Сафардан қайтгач, барча дераза ва эшикларнинг ёпиқ бўлганига қарамай, буюмлар устида чанг қатлами ҳосил бўлганини кўриб ҳафсалангиз пир бўлди. У қаердан келди дейсизми? Албатта, ҳаводан.
Қуёш ёруғлигида миллионлаб майда чанг зарраларини кузатиш мумкин. Улар микроскопик текстил толалари, нобуд бўлган тери зарралари, кўчадаги қоракуя, гул чанглари, моғор, ҳалок бўлган ҳашарот парчалари ва бошқа минглаб моддалардан ташкил топган. Чанглар мунтазам равишда уйнинг пастки қисмига чўкиб боради.
Диван, тўшак ва ёстиқларни микроскоп орқали кузатганингизда, кўзингизга уйқу келмай қоларди, балки. Чойшаб ва юмшоқ мебеллар чириган моддалар билан озиқланувчи жўлакларнинг севимли макони ҳисобланади. Ушбу микроскопик ҳашаротлар ҳар бир уйда истиқомат қилиб, ўлган тўқима зарралари билан озиқланади. Улар иссиқ ва қоронғу ерларни ҳуш кўргани сабаб мебел жилди ва ёстиқлар остида яшашга одатланган. Жўлаклар ёстиқлар ва чойшаблар остида йилллар давомида яшаб, ўша ернинг ўзида ҳалок бўлади. Ўлган ҳашарот парчалари аллергия келтириб чиқаради.
Чангга аллергияси бор инсонлар аслида ушбу ҳашаротлардан азият чекадилар. Ушбу майда зараркунандалар билан курашиш учун юмшоқ мебел танлаш борасида теридан ишланган жиҳозлар сотиб олишга ҳаракат қилинг.
Қуруқ ҳаводаги енгил чанг узоқ вақт давомида уйнинг пастки қисмига тушмайди. Одатда, намлик даражаси юқори бўлган ҳаво қуруқ ҳаводан тозароқ бўлади. Инсон учун мукаммал намлик даражаси 40-60 фоизни ташкил этгани билан уйлардаги намлик даражаси 20-25 фоиздан юқорига кўтарилмайди.
Аквариум ва уй ичига ўрнатилган декоратив фонтанлар чиройли кўриниш берибгина қолмай, намлик даражасини кўтаришга ёрдамберади.
Нам ҳавода чанг ивиб қолади ва тезлик билан полга тушади, чангни полдан тозалаб олиш эса қийинчилик туғдирмайди.
Уйда чанг йиғувчи буюмлар қанча кўп бўлса, чангни тозалаш шу қадар қийинлашади. Ҳайкалча, рамкага солиб қўйилган расм, ойнасиз шкафларга терилган китоб, юмшоқ ўйинчоқлар, кўп қаватли парда ва пахмоқ гиламлар чангни магнит каби ўзига тортиб олади. Агар майда буюмларсиз уйингиз бефайз бўлиб қолгандек туюлса, уларни ойнаванд шкафларга жойлаб қўйинг. Техника воситалари ишлаётган вақтида жуда кўп чанг тортиб олгани сабаб, телевизор ва компютерни очириш ёддан кўтарилмасин.Турғун ҳаво турли замбуруғ, жўлак ва чанг кўпайиши учун жуда қулай. Бундан ташқари уни жиҳозлашда фойдаланилган баъзи буюмлар йиллар давомида зарарли токсинлар ишлаб чиқаришда давом этади.
Ёпиқ бинода ушбу зарарли моддалар таъсири янада ортади. Шу боис эрталаб ва уйқудан олдин ҳоналарни шамоллатиб юборинг.
Уйни ҳар бир квадрат метрида йилига 8 граммдан чанг йиғилади. Чангдан бутунлай ҳалос бўлиш усули мавжуд бўлмасада, юқоридаги усуллар ёрдамида уй тозалигини таъминлаш ва саломатлигингиз ҳақида қайғуришдан чарчаманг.
Кизикарли маълумотлар
Ҳаводаги чангни тозлаш мумкинми?