Футболнинг инсон саломатлигига таъсири
Дунёда футболчалик оммавий спорт бўлмаса керак. Уни “миллионлар ўйини” дейишлари ҳам бежизга эмас. Дунёнинг исталган нуқтасида футбол муҳлислари топилади.
Албатта, футбол билан шуғулланган одам соғлом бўлади. Ҳаётда семизликдан азият чекаётган футболчини ҳеч кўрганмисиз? Йўқ, албатта. Тинимсиз машғулотлар ўйинчини ҳар томонлама тоблаши шубҳасиз.Даниядаги Копенгаген университети олимлари уч йил давомида футболнинг саломатликка таъсирини ўрганиб чиқишди. Уларнинг айтишича, футбол йиқилишлар туфайли суяклар синиши эҳтимолини анчагина камайтиради. Гап шундаки, спортнинг бу тури билан мунтазам шуғулланиш мушакларни ва суяк тўқималарини мустахкамлашга хизмат қилади.
Бундан ташқари, шуғулланувчиларда ҳаракатлар координацияси сезиларли даражада яхшиланади.Бу гап нафақат ўсмирлар ва ёшлар балки кексаларга ҳам тегишли.
Шунингдек, олимлар футбол билан шуғулланишнинг руҳий саломатликка ҳам нафи катталигини таъкидлашмоқда. Югуришнинг фойдаси ҳақида ҳаммамиз эшитганмиз. Лекин бундай машғулотдан кейин ҳам, айниқса, эркакларда руҳий ҳолатнинг яхшиланиши кўпам кузатилавермас экан. Чунки улар югуради-ю, лекин ҳаёли муаммоларда бўлади. Футболда эса бунақаси кузатилмайди: қатнашчиларнинг баъри бор диққат эътиборини ўйинга қаратгани учун бошқа нарсаларни ўйлашга имкон йўқ. Шунинг учун ҳам футболдан кейин ҳаваскор ўйинчиларнинг кайфияти кўтарилганини кўрасиз, мағлуб томон ҳам одатда ҳафа бўлмайди.
Футбол билан қисқа муддат шуғулланишнинг ҳам одам организмига фойдаси бор: уч ой давомида ҳафтасига 2-3 марта 1,5-2 соатдан тўп тепсангиз, танангизда кислород истеъмоли сезиларли даражада ортади. Бу эса организмдаги барча органлар ва тизимларга, биринчи навбатда, юрак-қон томир ва асаб тизимларига ижобий таъсир кўрсатади.
Тўғри футболнинг соғлиққа фойдаси кўп, аммо у билан ҳамма ҳам шуғуллана олмайди. Масалан, астматиклар ва юрак етишмовчилигига чалинганлар учун бу спорт тури тўғри келмайди.
Кизикарли маълумотлар
Футболнинг инсон саломатлигига таъсири