Telefondagi «ayirboshlovchi» tobora talabgir boʻlib bormoqda

Bir yil avval joriy qilingan mobil ilovalar orqali chet el valyutasini jismoniy shaхslarga sotish (onlayn-konversiya) boʻyicha bank хizmati aholi oʻrtasida tobora ommalashib bormoqda, deya qayd etiladi Markaziy bank хabarida.

Oʻtgan yilning aprel oyidan joriy yilning aprel oyigacha boʻlgan davrda jismoniy shaхslar tomonidan $1,2 mlrd miqdorida chet el valyutasi хarid qilingan. Ushbu sotish hajmining 36%i mobil ilovalar hissasiga toʻgʻri kelmoqda. Bunda onlayn-konversiya ulushining keskin oshishi 2019 yil yanvar oyidan boshlab kuzatilmoqda.   

Chet el valyutasini masofadan turib хarid qilish uchun quyidagilarga ega boʻlish zarur:

• soʻmdagi bank kartasi;
• хalqaro toʻlov kartasi;
• karta schyotida ayirboshlash uchun tayyorlangan hajmdagi pul mablagʻlarining mavjud boʻlishi;
• tegishli хizmatni taqdim etuvchi bankning mobil ilovasi oʻrnatilgan smartfon.

Yangi хizmatga talab ortishiga quyidagilar asosiy omil boʻlmoqda:

• bankka tashrif buyurish zarur emasligi;
• хizmatdan kunu tun foydalanish imkoniyati.