PARMEN
PARMEN, Qishki Parmen — kuzgi olma navi. Vatani — Angliya. Oʻzbekistonga 19-a. ning oxirlarida keltirilgan. 1959-y. da Oʻzbekistonda ekish uchun tavsiya etilgan ekin navlari davlat reyestriga kiritilgan. Daraxti oʻrta boʻyli — 5,5—6 m, qulay sharoitda, unumdor yerda 7,5 m gacha yetadi. Koʻchati oʻtqazilgach, 4—5-y. da hosil beradi. 10 — 12 yoshida baʼzi daraxtlari 200—300 kg hosil beradi, lekin solkash. Rozmarin, Renet Shampan navlaridan yaxshi changlanadi. Mevasi yumaloq yoki yapasqi choʻziq, sirti silliq, rangi taram-taram, qizil-toʻq sariq, eti sargʻimtir, qattiq, vazni 80—100 g, baʼzan 100—135 g. Toshkent, Fargʻona, Namangan, Jizzax, Samarqand, Surxondaryo viloyatlarida r-nlashtirilgan.
Ensiklopediya.uz
PARMEN