DO`STLARGA ULASHING:

Oydin Hojiyeva 1942 yilning 22 aprelida Navoiy viloyati, Qiziltepa tumanidagi Boʻston qishlogʻida dehqon oilasida tugʻildi. Toshkent davlat universiteti (hozirgi OʻzMU)ning filologiya fakultetida tahsil oldi (1960–1965).

“Sharq yulduzi” jurnalida adabiy xodim, boʻlim mudiri (1965–1976), “Saodat” jurnalida boʻlim mudiri (1976–1985), “Gulxan” jurnali (1985–1994), “Saodat” jurnali (1994–2013), jurnal ilovasi “Gulchehralar” gazetasi bosh muharriri vazifalarida xizmat qildi.

Ilk kitobi “Shabnam” 1970 yilda dunyo yuzini koʻrdi. Shundan soʻng “Manzillar” (1971), “Men sevgan qoʻshiq” (1972), “Zarkokil qiz va quyosh” (1972), “Orzu guli” (1974), “Tarovat” (1976), “Navo” (1977), “Buvisining oʻz qizi” (1979), “Dostonlar” (1980), “Xushxabar”, “Mushfiq onajon” (1983), “Chashmalarni izlayman” (1986), “Koʻzimning oqu qorasi” (Saylanma, 1986), “Tamal toshi” (1988), “Ishonch yulduzi” (1989), “Panohim” (1998), “Nazokat” (2007), “Shom shuʼlalari” (2010), “Tong tuhfalari” (2012), rus tilida “Utrennya rosa” (1973), “Pyatnadsat pod odnoy kriʼshoy” (1974), “Javoronok” (1984), “Uryukovaya kostochka” (1985), “Osnova” (1987), qoraqalpoq tilida “Onam sevgan qoʻshiq” (1972) kabi oʻttizga yaqin sheʼriy, publitsistik maqolalar toʻplamlari, “Kelinchak”, “Hayotga taʼzim”, “Bolalik dostoni”, “Boʻztoʻrgʻay” kabi poemalari nashr etildi.

Vatanga muhabbat, maʼnaviy poklik, til bilan dil birligi, hayotning abadiy orzu-armonlari, inson matonati, xalqimizning olijanob qalbini kuylash, odamlarga munis, mehribon dardkash boʻlmoq istagi shoira ijodining bosh mavzusidir. “Istiqlolga qasida” (1992), “Elim”, “Buxoro taronasi” (1997), “Ozod soʻz yolqinlari” (2001), “Buyuk karvon”, “Tavallud taronasi” (2002), “Ziyorat” (2004) kabi doston, qasidalarida mustaqillikni ulugʻlash, istiqlolga sadoqat gʻoyalari tarannum etiladi.

Oydin Hojiyeva tarjimon sifatida Sh. Petefi, A. Mitskevich, R. Kazakova, M. Dilboziy, E. Ognetsvet, Gulruxsor, M. Abulqosimova, F. Ungarsinovalarning sheʼrlarini oʻzbek tiliga oʻgirdi. Ayni choqda oʻzining ham bir qator asarlari rus, ukrain, qozoq, qirgʻiz, tojik, belorus, fransuz, ingliz va urdu tillariga tarjima qilindi.

Oydin Hojiyeva ona va bola mavzusiga bogʻishlangan dolzarb maqolalari bilan ham tilga tushdi. “Ruhimizga yongʻin tushmasin”, “Meni iztirobga solar bu oʻylar”, “Millatning qaygʻusi nima?” kabi publitsistik maqolalarida mustaqillikka erishish ostonasida til masalalari, oʻzbek xotin-qizlarining ogʻir dala mehnati muammolarini dadil koʻtardi. Oʻzbekiston xotin-qizlar harakatini faollashtirishda, yoritishda jonbozlik koʻrsatdi. “Milliy va ijtimoiy barkamollik” jamgʻarmasiga rahbarlik qildi (1993–1995).

Oʻzbekiston xalq shoiri Oydin Hojiyeva fidokorona mehnatlari, mustaqillikni mustahkamlash borasidagi faoliyati, badiiy adabiyotimiz ravnaqi yoʻlidagi samarali xizmatlari uchun “El-yurt hurmati” (1999) ordeni bilan mukofotlangan.

“Oʻzbek adiblari” (S. Mirvaliyev, R. Shokirova. Toshkent, Gʻafur Gʻulom nomidagi adabiyot va sanʼat nashriyoti, 2016) kitobidan.