MEYSTERZINGERLAR SANʼATI

MEYSTERZINGERLAR SANʼATI (nem. Meister — usta, Singer — xonanda) — Germaniyada 14—16-a. larda rivoj topgan xonanda va shoirlar ijodi. Meysterzingerlar Oʻrta asrda yashab ijod etgan boshqa hunarmandlar qatori, oʻz uyushmalariga ega boʻlib, maxsus risola (tabulatura)larda qayd etilgan qoidalar asosida faoliyat koʻrsatishgan. Faqatgina yangi, oʻziga xos kuy yarata olgan hamda uni yuqori saviyada ijro eta olgan xonanda-ijodkor usta (Meister) unvoniga sazovor boʻlgan. Meysterzingerlar oʻz qoʻshiqlarini yakka tarzda cholgʻu joʻrnavozligisiz ijro etgan. 14—15 a. larda qoʻshiklarning sheʼriy asosini diniy, keyinchalik boshqa mavzular tashkil etgan. X. Fols, G. Saks, G. Fogel va b. meysterzingerlar mashhur. R. Vagner M. s. ga bagʻishlab «Nyurnberg meysterzingerlari» operasini yaratgan.

Ensiklopediya.uz
MEYSTERZINGERLAR SANʼATI