JIZZAX POLITEXNIKA INSTITUTI

JIZZAX POLITEXNIKA INSTITUTI — kimyo texnologiyasi, avtomobil va avtomobil xoʻjaligi, bino va inshootlar qurilishlari, fermer xoʻjaliklari va b. boʻyicha mutaxassislar tayyorlaydigan oliy oʻquv yurti. 1989-y. da Toshkent politexnika in-ti Jizzax boʻlimi tashkil etilib, 1990-y. da Toshkent arxitektura-qurilish in-ti Jizzax boʻlimiga aylantirildi. 1992-y. da Toshkent kimyo-texnologiya in-ti Jizzax boʻlimi, Toshkent avtomobil transporti va yoʻllari in-ti Jizzax umumtexnika f-ti, Toshkent arxitektura-qurilish inti Jizzax boʻlimlari birlashtirilib Jizzax politexnika instituti tashkil etildi. In-tda avtomatika, muhandislik iqtisodiyoti, sanoat texnologiyasi va qurilish f-tlari hamda sirtqi f-tlari mavjud. In-tda kunduzgi boʻlimda 13 ta yoʻnalish boʻyicha bakalavrlar, 4 ta mutaxassislik boʻyicha magistrlar; sirtqi boʻlimda 16 ta yoʻnalish boʻyicha bakalavrlar tayyorlanadi. 2000/2001 oʻquv yilida 1900 dan ortiq talaba taʼlim oldi; 18 ta kafedra va 4 ta ilmiy lab. boʻlib, unda 143 prof.oʻqituvchi, jumladan 1 akad., 13 fan d-ri va prof., 49 fan nomzodi, 20 dotsent ishladi. In-tda aspirantura, 40 oʻquvchiga moʻljallangan tayyorlov kursi mavjud. In-t kutubxonasida 67 mingdan ziyod asar saqlanadi. 2002-y. gacha 6500 dan optiq, mutaxassis tayyorlandi.