Homiladorlikning 9 haftaligida nimalar bo’ladi

9 hafta: homilangiz kattaligi go’yoki gilosdek

Siz rasman 1-trimestringizning so‘nggi oyidasiz. Ehtimol siz homilador ekanligingizga allaqachon ko‘nikdingiz va sizning ichingizdagi homila endi sizga begona narsa bo‘lib tuyulmaydi. Homiladorlikning 9 haftasida siz endi tanangizda bolaning borligini yaxshi his qilasiz. Homiladorlikning dastlabki haftalarida ba’zi ayollarda harakatlanish qiyinlashadi, ba’zilari esa o‘zlarini odatdagidek his qilishadi. Agar siz muammosiz kechayotgan odamlardan bo‘lsangiz, xavotir olmang, homiladorlik hissiyotlarini boshdan kechirish uchun sizda yana 30 hafta bor.

Homiladorligingizni bilmaganlarga siz sal to‘lishgandek ko‘rinishingiz mumkin. Oldingidek tor shimlar va yubkalar sizga endi mos kelmaydi, siz o‘zingizga mos keladigan narsalar bilan cheklanishingiz kerak. Homiladorlar uchun mo‘ljallangan kiyimlarni kiyishga hali erta, shuning uchun garderobingizdan o‘zgartiriladigan belbog‘li kiyim izlang.

Homiladorlikning 9 haftasida siz oilangizga va yaqinlaringizga yangiligingiz haqida aytish yoki aytmaslik haqida o‘ylashingiz mumkin. Spirtli ichimliklarni, chekishni rad etish, ishtahangizdagi o‘zgarishlar yoki hojatga ko‘p qatnash – bularning barchasi kuzatuvchan shaxslarni qiziqtirishi mumkin.

Biroq, yangiliklarni aytish uchun ideal vaqt bo‘lmaydi. Shuning uchun, ko‘p juftliklar bola tushish xavfi kamaygandan 1 trimestrining oxiri kutishadi.

9 haftada tanangizdagi jismoniy o‘zgarishlar

Homiladorlikning 9 haftasida, bachadoningiz kengayayotganini sezish yoki his qilishga hali juda erta. Homila hali ham qov suyagi orqasida himoyalangan va u 12 haftaning oxirigacha yuqoriga ko‘tarilishni boshlamaydi.

Siz o‘z venalaringizni yanada aniqroq ko‘rishingiz mumkin, ayniqsa ko‘kragingiz va oyoqlaringiz sohasida ular aniq bilinadi. Agar siz bir muddat turib qolsangiz oyoqlaringiz og‘riydi va o‘tirishni xohlab qolasiz. O’tirganingizda imkoniyat darajasida, oyoqlaringizni ko‘tarishga harakat qiling va ularni stulga yoki oyoq tagligi moslamasiga qo‘ying.

Siz vaginal ajralma ko‘payganligini sezasiz. Bu homiladorlik davrida odatiy holdir va agar u hidlanmasa, sariq rangda bo‘lmasa yoki ta’sirlantiruvchi xossaga ega bo‘lmasa, tashvishlanmang. Bunday holatlarda ko‘p homilador ayollar tagliklardan foydalanadilar.

Siz vaqti-vaqti bilan spazmlar va qorinning pastki qismida og‘riqlar sezishingiz mumkin. Bu normal holat va u hayzdan oldingi diskomfort va og‘irlikni eslatadi. Ammo, agar siz og‘riqlarni doim sezsangiz, qindan qon ketsa yoki shunchaki bezovta bo‘lsangiz, shifokoringizga murojaat qiling.

Sizning ko‘krak so‘rg‘ichlaringiz kattaroq va to‘q rangda bo‘lishi kerak. Shuningdek, areola atrofida mayda husnbuzarsimon toshmalar paydo bo‘lganini payqashingiz mumkin. Ular Montgomera do‘mboqchalari deb nomlanadi va ular sizning so‘rg‘ichlaringizni emizishga tayyorlashga yordam beradi. Ularni siqmang yoki ulardan xalos bo‘lishga harakat qilmang. Yuzingizda hosil bo‘ladigan ugrilardan farqli o‘laroq, ularning o‘z vazifalari bor!

Ha, bu haftada xuddi o‘smirlik davrida bo‘lgani kabi, sizga yana husnbuzarlar toshishi mumkin. Ushbu homiladorlik gormonlari, ular bajaradigan barcha muhim funksiyalarga qaramasdan, yuzingizda dog‘ qoldirishi mumkin. Ularga surtadigan narsalarga ehtiyot bo‘ling – homiladorlik paytida ba’zi kremlardan foydalanish tavsiya etilmaydi.

9 haftada sizdagi hissiy o‘zgarishlar

Ushbu haftada siz o‘zingizni yomon his qilishingiz mumkin. Har doimgidek ko‘ngil aynish va charchoq hanuzgacha uchraydi va bu holatni yengillashtirish uchun siz hech narsa qila olmaysiz. Ammo ko‘pgina ayollar 1-trimestr oxirida o‘zlarini ancha yaxshi his qila boshlaganlarini payqashadi.

Ehtimol, siz eringiz homiladorlikka siz kabi ko‘p e’tibor bermayotganini sezishingiz mumkin. U sizning homiladorligingizni faqat sizdan ko‘p eshitadigan ba’zi simptomlar orqali his qiladi, lekin o’zi ko‘rmaydi va ularni o‘zi his qilmaydi. Unda ishtiyoqning yo‘qligini beparvolik bilan bog‘liq deb o‘ylamang. Ayni paytda, u homiladorligingizni hali tushunmagan bo‘lishi mumkin.

Ba’zi ayollar bu vaqtda onalik mehri uyg‘onmaganligi uchun o‘zlarini aybdordek his qilishadi. Ular bolaning bu salbiy his-tuyg‘ularni “tushunib qolishi” va bu bo‘lajak mehmonga nisbatan eng yoqimli qabul emasligini his qilishi mumkinligi haqida tashvishlanishi mumkin. Agar siz o‘zingizni shunday his etayotgan bo‘lsangiz xavotir olmang. Bolada siz qanday his etayotganingizni biladigan qobiliyat yo‘q.

Har doim charchoq va holsizlikni his qilsangiz, tegishli xulosalar chiqarishingiz kerak. Oddiy hayotga intiling va kuchingiz yo‘q narsalarga “yo‘q” deb aytishni o‘rganing.

9 haftada bolangizdagi o‘zgarishlar

Endi bolangizning uzunligi 2,3 sm. Bu haftada uning o‘lchami o‘rtacha gilos o‘lchamiga teng bo‘ladi.

Siz ushbu haftada shifokorga chiqishingiz kerak, shifokor Doppler yoki UTT yordamida bolaning yurak urishini o‘lchashi kerak. Ko‘p salfetka tayyorlang, chunki bu siz va yaqinlaringiz uchun juda ko‘p quvonch keltiradigan ajoyib lahzadir.

9 haftaning boshida bolaning ko‘zlari kattaroq bo‘ladi va hatto ma’lum bir miqdorda pigmentlar (ranglar) bo‘ladi. Aksariyat bolalar ko‘k yoki jigarrang ko‘zlar bilan tug‘iladi. Farzandingizning doimiy ko‘z rangi 6-9 oydan so‘ng aniq bo‘ladi va ular sizdan va ularning otasidan meros bo‘lib o‘tadigan irsiyatga juda bog‘liq bo‘ladi.

Farzandingizning quloqlari ham ichkarida, ham tashqarida shakllanadi. Og‘iz bo‘shlig‘ida kichik til rivojlanadi va hatto jag‘larda tish o‘rinlari paydo bo‘ladi.

9 hafta uchun maslahatlar

Ushbu haftada tug‘ish bo‘yicha mashg‘ulotlarga boring. Ehtimol, siz biron o‘rinni band qilishingizga to‘g‘ri kelar, chunki bunday kurslarga talab yuqori bo‘lishi va siz kutish ro‘yxatida qolib ketishingiz mumkin.

Sizning hududingizdagi prenatal mashqlar yoki yoga kurslariga yozilishni o‘ylab ko‘ring. Bu boshqa homilador onalar bilan tanishish va yangi do‘stlarning qo‘llab-quvvatlovchi tarmog‘ini yaratishning ajoyib usuli bo‘lishi mumkin.

Agar siz odatda yugurish bilan shug‘ullansangiz, ushbu mashqni boshqa mashqqa o‘zgartiring. Homiladorlik paytida takrorlanuvchi og‘ir yuklamalar tavsiya etilmaydi va kamroq yuklamali boshqa ko‘plab mashqlar mavjud.