Homiladorlikning 19 haftaligida nimalar bo’ladi

19 hafta: homilangiz kattaligi go’yoki apelsindek

Ura! Siz homiladorlik davrining deyarli yarmidasiz. Homila paydo bo‘lgan vaqtdan boshlab, 16 hafta ichida sizning tanangizda ham, rivojlanayotgan bolangizda ham katta o‘zgarishlar ro‘y berdi. Shunga qaramay, ba’zi ayollar homilador ekanliklarini hali ham aniq bilmaydi. Qorinning zich mushaklari kattalashib borayotgan bachadonni yashirishi mumkin yoki aksincha, agar ayolning o‘zi biroz to‘la bo‘lsa, bu uning homiladorligini yashirishi mumkin. Agar siz homiladorligingiz haqidagi yangiliklarni sir saqlashni xohlasangiz, ayniqsa sovuq oylarda, qorinni to‘g‘ri tanlangan kiyim bilan yashirish mumkin.

O‘zini boshqalar bilan solishtirish, ayniqsa homilador ayollarda va qorin hajmini taqqoslash inson tabiatiga xosdir. Agar sizda faqat sizga ko‘rinadigan kichkina qorin bo‘lsa, o‘zingizni xafa qilmaslikka harakat qiling. Har bir ayol o‘z homiladorligini har xil tarzda boshdan o‘tkazadi. Homilador onaning qorni qandayligiga qarab, bolaning o‘lchamini, ahvolini yoki hatto jinsini aniqlab bo‘lmaydi. Qo‘shningiz yoki qaynonangiz nima deganlariga e’tibor bermang.

Mening hamyonim qayerda?

Bolalar uchun narsalar haqida o‘ylash vaqti keldi. Oilangizda yangi kichkina odamga xonacha tayyorlashga kirishishga endi erta emas. Kichkintoylarning uxlashlari uchun eng xavfsiz joy bu, dastlabki 12 oyda, ota-ona krovati yonidagi beshiklardir. Energiya darajangiz ko‘tarilganda va bu haqda o‘ylashga ko‘p vaqtingiz bo‘lganda, siz bolalar kiyimlari va bolalar uchun mebellarni xarid qilishni boshlashingiz mumkin. Agar mablag‘ingiz kam bo‘lsa, ikkinchi qo‘ldan sotib olish yoki qarz olish haqida o‘ylab ko‘ring. Agar siz hamma narsaning yangisini sotib olishni xohlamasangiz, sizga bolalari bor do‘stlaringiz bajonidil yordam berishi mumkin. Ammo, agar siz ko‘p bolali bo‘lishni rejalashtirmoqchi bo‘lsangiz, o’zingiz xohlagan narsangizni bir marta sotib olib, undan barcha bolalaringiz uchun foydalanishingiz mumkin.

19 haftada tanangizdagi jismoniy o‘zgarishlar

Siz o‘zingizni nafasingiz tiqilayotgandek his qilishingiz mumkin va odatdagidek chidamli emassiz. Sizning qon aylanish tizimingiz butun tanangiz bo‘ylab va kindik orqali bolaga qonni samarali ravishda yetkazib berish uchun ko‘p ishlaydi. Ovqatlanish ratsioningiz temirga boy va “C” vitamini ko‘p ekanligiga ishonch hosil qiling. Ushbu moddalar go‘sht, yashil bargli sabzavotlar, sifatli bo‘tqalar va yangi mevalarda mavjud bo‘ladi.

Siz juda tez terlashingiz mumkin, chunki ichki harorat biroz yuqori bo‘ladi. Sizda kuniga 24 soat ishlaydigan o‘zingizning ichki isitgichingiz bor, demak siz ham boshqalar singari ko‘p qavatli kiyim kiyishni xohlamasligingiz mumkin. Qanchalik kerak deb hisoblasangiz, shuncha marotaba dush qabul qiling. Sintetik kiyim kiyishdan saqlaning va qizib ketmang. Issiqligingizdan ventilyator yoki konditsioner bilan uxlashim kerak deb o‘ylashingiz mumkin.

Siydik yo‘llari infeksiyalaridan ehtiyot bo‘ling. Ayol uretrasi nisbatan qisqa bo‘ladi va bakteriyalar siydik pufagiga osongina kirishi mumkin. Hojatxonadan foydalangandan keyin oldindan orqa tomonga artishni unutmang va jinsiy aloqadan oldin va keyin siydik pufagingizni bo‘shating. Ko‘p miqdorda suyuqlik iching va xohlaganingizda hojatxonaga boring. Borganingizda qovuqni to‘liq bo‘shatganingizga ishonch hosil qiling va shoshmaslikka harakat qiling.

Sizning bachadoningiz deyarli kindik darajasida, shuning uchun belingiz bilan xayrlashing. Ko‘nglingizni buzmang, chunki bola tug‘ilgandan keyin hamma narsa o‘z joyiga qaytadi.

Jig‘ildon qaynashi bu hafta sizning yangi hamrohingiz bo‘lishi mumkin. Homiladorlik gormonlari oshqozon va ichakdagi silliq mushak tolalariga ta’sir qiladi. Bu shuni anglatadiki, oshqozonda qolishi kerak bo‘lgan kislotali tarkib qizilo‘ngachga (ovqat hazm qilish traktiga) osongina chiqishi mumkin. Ovqatdan keyin, ayniqsa achchiq ovqatlardan keyin achishish hissi paydo bo‘lishi mumkin. Yumshoq ovqatlarni yeyish va juda boy va hazm qilish qiyin bo‘lgan ovqatlarni yemaslik ba’zi onalarga yengillik beradi. Ikkita yostiqda uxlashga harakat qiling va antatsidlarni qabul qilish siz uchun xavfsizligi to‘g‘risida shifokoringiz yoki farmatsevtingiz bilan maslahatlashing. Bir stakan sovuq tinchlantiruvchi sut iching, u sizga juda foydali.

19 haftada sizdagi hissiy o‘zgarishlar

Farzandingiz harakatlanishini boshlaganda, siz juda xavotirga tushishingiz mumkin. Ehtimol siz ba’zi “jonlanish” ni his qilib, bundan hayajonlangandirsiz. Siz qo‘lingizni qorningizga qo‘yib, o‘tirasiz va bu kichkinagina hilpillashni, bolangiz bilan hamma narsa yaxshi ekanligini eslatishini kutasiz. Faqat eringizdan iltimos qilganingizda, u ham uni his qilishi mumkinligini kutmang, bolalar ham kerak bo‘lganda har doim ham harakatlanavermaydi.

Bu davrda siz bolaga juda diqqatli bo‘lishingiz va boshqa odamlarga unchalik qiziqmasligingiz mumkin. Bu onalarga nima qilish kerakligini birinchi o‘ringa qo‘yishga yordam berishning tabiiy usuli. Endi hech qachon boladan boshqa hech kim haqida o‘ylay olmayman degan hissiyotlardan saqlaning, boshqa ko‘p muammolaringiz o’zidan o’zi hal bo‘lib ketishi ham mumkin.

Agar siz depressiyaga moyil bo‘lsangiz yoki ruhiy kasallik o‘tkazgan bo‘lsangiz, bu siz uchun og‘ir davr bo‘lishi mumkin. Sizda sizni qo‘llab-quvvatlay oladigan tibbiyot mutaxassisi bo‘lishi juda muhimdir. Agar o‘zingizni yomon his qilsangiz ayting va yordam so‘rang.

19 hafta bolangizdagi o‘zgarishlar

Kichkintoyingiz 15 santimetrdan biroz kattaroq va terisi shunchalik shaffofki, uning venalari aniq ko‘rinib turadi. U yog‘ to‘plashiga hali juda erta, garchi ushbu haftada u jigarrang yog‘ deb nomlanuvchi maxsus turdagi moddalarni ishlab chiqara boshlaydi. Bu chaqaloqlar yangi tug‘ilgan davrda hayotiy a’zolarini haddan tashqari harorat ta’siridan himoya qilishga yordam beradigan noyob modda.

Pishloqsimon yog‘ – bu haftada bolangiz terisining ko‘p qismini qoplaydigan oq, yog‘li modda. Agar bolangiz erta tug‘ilsa, unda hali ham yog’ izlari qoladi, ammo muddatga yaqinlashganda yoki bir yildan keyin uning tanasi tozalanadi.

Bu hafta bolangizning buyraklari yaxshi ishlamoqda. Ular amnion suyuqligining muhim foizini tashkil etadigan siydikni chiqaradi. Agar ushbu haftada sizni UTTda tekshirsa, bolangizning buyraklarini ko‘rishingiz mumkin.

Farzandingizning kichkina boshida va tanasida ko‘proq soch o‘sa boshlaydi. Erta tug‘ilgan chaqaloqlar nozik sochlarga ega bo‘lishi mumkin, ayniqsa orqa va elkalarida. Ba’zi chaqaloqlar sochsiz tug‘ilishadi va bir necha oy shunday bo‘lishadi, boshqalari qalin sochlar bilan tug‘ilishadi. Bu haqiqatan ham har bir bola uchun individual.

Farzandingiz uxlashga ko‘p vaqt sarflaydi. U yetilishi uchun o‘sadi va qimmatli energiyani saqlaydi. Ammo uning qachon faol va harakatda bo‘lishini va hatto tepishini bilasiz. Bu odatda onaning uxlamoqchi bo‘lganida yoki uxlashga yotganida yuz beradi.

19 hafta uchun maslahatlar

Ushbu haftada yoki keyingi haftada UTTga borishni unutmang. Homiladorlik paytida ikkinchi trimestrda UTT odatda 18-20 haftalarda amalga oshiriladi. Ular bolaning rivojlanishining turli tomonlarini, shu jumladan umurtqa, miya, yurak, buyraklar va boshqa hayotiy muhim organlarni ko‘rib chiqish uchun qilinadi. Agar siz bolangizning jinsini bilmoqchi bo‘lsangiz, buni aniqlashning ayni vaqti. Agar siz buni syurpriz bo‘lishini hoxlasangiz, oldindan UTT shifokorini ogohlantiring.

Agar siz hali boshlamagan bo‘lsangiz, bolangiz bilan gaplashing. 19 haftada, farzandingiz sizni va sizning ovozingizni eshitadi, endi u bilan muloqot qilishni boshlashning ayni vaqti. Iloji bo‘lsa, eringizni jalb qiling va bolangizning munosabatini his qiling.

Gantel bilan mashqlarni bajarish haqida o‘ylab ko‘ring. Bu sizning vazningizni ushlab turishga yordam beradi va homiladorlik diabetini rivojlanish ehtimolini kamaytiradi. Ba’zi homilador ayollar shaxsiy murabbiy bilan guruhda yig‘ilishadi, do‘stona munosabat va umumiy manfaatlardan bahramand bo‘lishadi.