DO`STLARGA ULASHING:

Egizak homiladorlik belgilarini shartli ravishda ikki guruhga bo’lish mumkin: ayolning sezgilari va tibbiy faktlar. Ba’zan birinchi ultratovushli tekshiruv bittadan ortiq farzand kutilayotganligini aniq tasdiqlab bera olmasligi kuzatiladi. Bu holda ayol bir nechta alomatlarga tayanishi mumkin bo’ladi.

Albatta ko’p homilali homiladorlik noyob holat emas. Bunga odatda quyidagi omillar ta’sir ko’rsatadi:

• Irsiyat. Ayol yoki uning turmush o’rtog’i oilasida egizak farzandlar uchragan bo’lsa;
• Ovulyatsiyani stimulyatsiya qilish. Agar biron-bir sababga ko’ra ayolga follikullar yetilishini rag’batlantiradigan gormonal dori-darmonlar buyurilgan bo’lsa;
• Uzoq muddat qabul qilingan oral kontraseptivlarni keskin bekor qilish. Bunday holda tuxumdonlar ikkilangan faollik bilan ishlay boshlaydi va ba’zi hollarda bir vaqtning o’zida bir nechta tuxum hujayra ishlab chiqaradi.

Egizak homiladorlikning dastlabki belgilari

Albatta, aniq natijani shifokor ultratovushli tekshiruv orqali aytib berishi mumkin (homiladorlikning 4-5-haftaligida amalga oshirilsa bo’ladi). Egizaklar rivojlanayotganligini onaning o’zi aniqlashi uchun esa quyidagilarga e’tibor qaratish kerak:

• Homiladorlik testida ikkinchi chiziqning juda yorqin bo’lishi. Hayz kechikishining dastlabki kunlaridayoq OXG gormoni darajasi juda yuqori bo’ladi. Bu holatda testda ikkinchi chiziq aniq ko’rinadi;
• Yaqqol ifodalanuvchi toksikoz. Bitta homila rivojlanishida toksikoz kuzatilmasligi ehtimoli bo’lsa-da, egizaklar rivojlanishida u muqarrar ravishda kuzatiladi. Ba’zida hatto homiladorlikning dastlabki haftalaridayoq;
• Ishtahaning kuchayishi. Bu holda barchasi mantiqiy: endi ayol nafaqat ikki, balki uch yoki hatto to’rt kishi uchun ovqatlanishga to’g’ri keladi;
• Kayfiyatning kezkin o’zgarishlari. Gormonlar darajasi o’zgarishlari tufayli kayfiyat kuniga bir necha marta o’zgarishi mumkin. Shu tufayli avval yig’lash, 10 daqiqa o’tgach esa o’zini dunyodagi eng baxtli ayoldek his qilishdan hech ham ajablanmaslik kerak;
• Holsizlik va tezda charchash. Uyquchanlik homiladorlikning erta muddatlarida barcha ayollar uchun xos bo’lgan holat. Ammo birvarakayiga bir nechta homilani ko’tarayotgan onalar buni kuchliroq his qilishadi. Butun tana og’irlashgandek seziladi, yagona istak esa — miriqib uxlab olish;
• Teri qizarishlari. To’satdan sodir bo’lgan gormonal o’zgarishlar tufayli yuzda uzoq vaqt bezovta qilmagan husnbuzarlar ham paydo bo’lishi mumkin;
• AFP uchun qon tahlili juda yuqori natijalarni ko’rsatishi.

Boshqa belgilar odatiy homiladorlik belgilaridan farq qilmaydi.

Bir vaqtning o’zida bir nechta homilani ko’tarish juda qiyin, shuning uchun juda ehtiyotkor va diqqatli bo’lish joiz. Shifokorga rejalashtirilgan tashriflarni o’tkazib yubormaslik, barcha tahlillarni o’z vaqtida topshirish va organizmning talablariga quloq tutish kerak.

Bo’lajak onalar o’zlarini tinchroq his qilishlari uchun saytimizdagi tug’ruq kunini aniqlash kalkulyatoridan foydalanishlari, homila jinsini aniqlash usullari bilan tanishishlari va foydali tavsiyalarni o’tkazib yubormaslik uchun homiladorlikka bag’ishlangan ruknni muntazam ravishda kuzatib borishlari mumkin.

med360.uz