DUNAYEVSKIY Isaak Osipovich haqida malumot bilib oling.

DUNAYEVSKIY Isaak Osipovich [ 1900.18(30). 1, Loxvitsa, hoz. Poltava viloyati — 1955.25.7, Moskva] — kompozitor, dirijyor, Rossiya xalq artisti (1950). Zamona-viy rus operetta hamda musiqali kinokomediya asoschilaridan, qoʻshiq janrining yirik ustasi. 12 ta operetta, 3 balet, kantatalar, dramatik spektakllarga musiqalar yozgan. Ayniqsa, «Quvnoq yigit-qizlar», «Darvozabon», «Sirk», «Kapitan Grant bolalari», «Boy kelin», «Volga-Volga», «Kuban kazaklari» kabi filmlar uchun yaratgan, simfonizm bilan yoʻgʻrilgan musiqalari va qoʻshiqlari ommaviylashgan. Ijodiy uslubi kuychanlik va xatto garmoniyalari ohangdorligi, xilma-xilligi, jaz ritmlaridan unumli foydalanilganligi bilan ajralib turadi. Ommabop qoʻshiq janrining yangi turlarini kashf etgan: qoʻshiq — marsh («Sport marshi», «Entuziastlar marshi», «Quvnoq sha-mol haqida qoʻshiq» va b.), qoʻshiq — vals («Maktab valsi», «Vals kechasi») va b. D. ga bagʻishlangan «Dunayevskiy ohanglari» nomli film ishlangan (1963). Oʻgʻli Maksim Dunayevskiy (1945, Moskva) — otasi anʼanalari davomchisi, «Yemelyaning baxti» (1975), «Kapitan Grant bolalari» (1987) kabi myuzikllar, 30 dan ortik, filmlar («Xayr, Meri Poppinz», «Uch mushketyor» va b.)ga esda qolarli musiqalar yaratgan.