Avstraliyalik erkak mobil internet yordamida bir kunda 994 gigabayt ma’lumot ko‘chirib oldi

3-aprel kuni Avstraliyaning Telstra kompaniyasi Free data day aksiyasini o’tkazdi. Uning doirasida bir kun davomida mobil internetdan foydalanganlik uchun to’lov olinmadi. Aksiyada qatnashgan foydalanuvchi Jon Sasvari bir kun ichida deyarli 1 terabayt ma’lumot ko’chirib olishga muvaffaq bo’ldi, deb xabar beradi TJournal.

Avstraliyaning eng yirik aloqa operatori bo’lgan Telstra kompaniyasida yil boshidan beri uchta yirik avariya sodir bo’lgani bois 16 million abonentning internet va telefoniya xizmatlaridan foydalanishida uzilishlar kuzatildi.

Buning badali sifatida kompaniya har bir uzilishdan so’ng bittadan Free data day aksiyasini o’tkazdi. Oxirgi aksiya davomida 27 yoshli Sasvari imkon qadar ko’proq fayl ko’chirib olish uchun o’z smartfonida wi-fi’ga ulanish nuqtasini yoqdi. Bir kun mobaynida u «Simpsonlar» multfilmining 24 mavsumini, «Afsonalar kushandasi» shousining 14 mavsumini, «Vikipediya» ma’lumotlar bazasi nusxasini ko’chirib olishga, shuningdek, o’z fayllari va fotosuratlaridan bulutli resurslarga nusxa ko’chirishga ulgurdi.

Internetning maksimal tezligi 180 megabit/sekundni tashkil qildi.

Umuman olganda, Telstra abonentlari shu bir kun davomida 2686 terabayt ma’lumot ko’chirib oldi. Birinchi aksiyada bu ko’rsatkich 1841 terabaytga teng bo’lgan edi.

Manba:

daryo