ASO-MUSO haqida malumot bilib oling.

ASO-MUSO, hassa-muso (Abelia corymbosa) — shilvidoshlar oilasining abeliya turkumiga mansub sershox va serbarg buta. Tanasining poʻsti kulrang, titilgan, baʼzan tanadan qisman ajralgan. Poyasi olti qirrali. Barglari qisqa bandli, ellipssimon (1,5 — 6 sm), cheti tekis, baʼzilari kungurador. Gullari bir nechtadan (koʻpincha uchtadan) boʻlib, toʻpgulga yigʻilgan; kosacha qaytaqisi (5 — 8 mm kenglikda) toʻrt (baʼzan uch) boʻlakli; toj-bargi oqish, 10—15 mm uzunlikda, changchilari toʻrttadan boʻlib toj naychasining ichida joylashgan; urugʻchisi bitta, urugʻchi ustunchasi naychadan bir oz chiqib turadi. Mevasi bir oz choʻziq va yapaloq (5 — 8 mm uzunlikda), tukli, faqat Oʻrta Osiyo (Tyanshan togʻlari) uchun xos endemik oʻsimlik. A. Kirgʻiztov, Talas, Sharqiy Chatqol, Susamir va Fargʻona togʻlari (Moylisoy, Arslonbob)ning yongʻoqzor va archazorlarida uchraydi. Yogʻochi qattiq boʻlganidan juda qadrlanadi.