Mehnatga haq toʻlash boʻyicha yangi tariflar setkasi 1 fevraldan joriy etiladi

U bandlik va mehnat munosabatlari vazirining 2020 yil 9 yanvardagi buyrugʻi bilan tasdiqlangan, deyiladi Bandlik va mehnat munosabatlari vazirligi Telegram-kanalida.

Prezidentning 30.12.2019 yildagi “Oʻzbekiston Respublikasining “2020 yil uchun Oʻzbekiston Respublikasining davlat byudjeti toʻgʻrisida»gi Qonuni ijrosini ta’minlash chora-tadbirlari toʻgʻrisida”gi PQ-4555-son qarori bilan 1 fevraldan boshlab ish haqi, pensiyalar, nafaqalar miqdorini oshirish nazarda tutilgan. Shu munosabat bilan mehnatga haq toʻlash boʻyicha yangi setka kiritilmoqda.

Eslatib oʻtamiz, shu sanadan boshlab respublika hududida:

• mehnatga haq toʻlashning eng kam miqdori (MHEKM) — oyiga 679 330 soʻm;
• pensiyani hisoblashning bazaviy miqdori — oyiga 238 610 soʻm;
• eng kam yoshga doir pensiyalar — oyiga 466 680 soʻm;
• bolalikdan nogironlarga beriladigan nafaqa — oyiga 466 680 soʻm;
• zarur ish stajiga ega boʻlmagan keksa yoshdagi va mehnatga layoqatsiz fuqarolarga beriladigan nafaqa — oyiga 286 390 soʻm.

Bazaviy hisoblash miqdori (223 000 soʻm)   oʻzgarishsiz qoldiriladi.