DO`STLARGA ULASHING:

1978-yilda, rassom Muborak oilasida jajji Manzura dunyoga keladi. Kichkina xonasini katta xayot yo’lida unga elkadosh bo’lgan opasi bilan bo’lishgan Manzura 5 yoshlik paytidanoq, bog’chadoshlarini o’zining noyob ovozi bilan hayron qoldirardi. Qizidagi qobiliyatni sezgan ijodkor ota, do’sti Karim Xoji bilan maslahatlashib, uni Uspenskiy nomidagi musiqa maktabiga beradi. U yerda olingan bilim va tajriba Manzurani vokal ustasi sifatida shakllantiradi. Yosh bo’lishiga qaramay Manzura, «Karubina» ariyasini «Neymer» orkestri jo’rligida kuylaydi. Katta diapazon bilan hammani hayratga solgan Manzura o’zida yangi kuch sezgach, faqat oldinga intilish zarurligini tushunib yetadi.

1996-yilda Manzura opasi Nigina va dugonasi Nargiza bilan «Sebonu» guruhini tuzadi. Iqtidorli xonanda Ravshan Zokirov boshchiligida trio 2 ta qo’shiq yozib, «Ofarin-96» ko’rik tanlovida 2-o’rinni egalladi. Kutilmagan burilish har uch ijodkorni ham quvontirdi. Natijada solist Manzura shu yili Uspenskiy nomidagi musiqa maktabini tugatib, Toshkent Davlat Konservatoriyasida o’qishni davom ettiradi. U paytga kelib guruhdagi Nargiza o’zini san’atshunoslikka bag’ishlaydi. Omadli trio esa sekingina «Osiyo» duetiga aylandi.

1997-yilda, guruhga «Bisko-biznes» firmasi katta yordam beradi. Muhiddin Qamariddinov boshchiligida ular o’zlarining birinchi «Yolg’izim» nomli albomlarini chiqaradilar. Shu yilning o’zida ular shu qo’shiqqa klip ham olib, tezda muhlis ortirrib, tanila boshlaydilar. Ikki xit «Yolg’izim» va «Men seni sevaman» juda ommalashdi.

2000-yil guruh tarkibida yana bir o’zgarish. Duet sologa aylanadi. Nigina o’zini dizaynerlik sohasida sinash maqsadida guruhni tark etadi. Shunda Manzura prodyuser Rustam Sa’diyev boshchiligida yakkaxon faoliyatini boshlaydi. Yangi prodyuser bilan hamkorlik, xonandaning ijodiga ijobiy ta’sir etib, omadli keladi. Manzura 2000-yilda rejissyor Madina Mo’minovaning «Tohir va Zuhra» musiqiy filmida boshqa kino yulduzlar bilan suratga tushishga taklif etiladi. Yakkaxon faoliyatini omadli boshlagan Manzura, mehnatining samarasini 2002-yilda ko’radi. Aniqrog’i, aynan shu yili u Prezidentimiz tomonidan ta’sis etilgan «Nihol» davlat mukofoti bilan taqdirlanadi. Xalq e’tiboriga tushib, mukofot egasiga aylangan har bir san’atkor, o’ziga yuklatilgan ma’suliyatini his qilib, yanada ko’proq ijod qilishga bel bog’laydi. Manzura aynan shu yili «Muhabbat sinovlari-1» filmida suratga tushishga va kartinadagi hamma soundtreklarni kuylashga muvaffaq bo’ladi. Rejissyor Rustam Sa’diyevning filmida yangragan har bir soundtrek qisqa vaqt ichida ommalashdi.

2004-yilda xalq talabiga binoan, «Muhabbat sinovlari-2» katta ekranga chiqadi. Ushbu film uchun ham saundtreklarni Manzura kuylaydi. 2004-yilning yana bir esda qolarli voqeasi: Manzura o’zining kutilgan birinchi «Bevafo» nomli yakkaxon konsertini «Turkiston» saroyining yozgi binosida o’tkazadi. Yil so’ngida esa uning shu nomli ilk albomi ham sotuvga chiqadi.

2005-yilda «Nahotki sen» filmi tomoshabinlarga taqdim etiladi. O’sha paytga kelib soundtreklar malikasiga aylangan Manzura yangi filmdagi barcha qo’shiqlarni kuylab, ommalashtiradi. Keyin esa «Nahotki sen» nomli navbatdagi to’plam ham qisqa vaqt ichida o’z muhlislarini topadi.

2006-yilda Manzura «Yilning eng yaxshi imidji» nomonatsiyasida «Tarona» mukofotini qo’lga kiritadi.

2007-yilda esa butkul yo’nalishini o’zgartira boshlaydi. Har qanday tajriba san’atkorning ijodiga yangi nafas olib kiradi. Manzura ijodiga, repertuariga kiritgan o’zgartirishlari talabchan muhlislar tomonidan yaxshi qarshilandi. Xonanda optimistik ruhiyatda, yangi qarashlar bilan «Tushlarimga kir» albomini yozib tugatadi. Mazkur to’plamdan uning xit qo’shiqlari, jumladan, «Panoh» filmiga ishlangan «Afsusdaman» soundtreki ham o’rin egallaydi. 2007-yilda Manzurani yangi katta kino kutib turgandi. Endi uni bosh qahramon sifatida texnologik film «Sevginator»ga taklif etishadi. 3 yil davomida O’zbekistonda hizmat ko’rsatgan san’at arbobi Munavvara Abdullaevadan aktyorlik mahoratidan saboq olgan Manzura ikkita obraz: robot va o’qituvchi qiz (Maftuna)ni mahoratli va ishonarli talqin etadi. Rejissyorning qo’ygan talablarini qiyinchilik bilan bo’lsada uddalagan xonanda qo’liga mikrofon olib qo’shiq kuylashdan tashqari, yaxshigina aktrisa ekanligini ham isbotladi. Tomoshabinlar tomonidan katta qiziqish bilan kutib olingan kartina, «Ijodiy parvoz» kinofestivalida gran-prini qo’lga kiritadi.

2009-yilda Manzura «Majnun va Layli» nomli albomini chiqaradi. Shu yilning o’zida izlanuvchan ijodkor «MTV&AWARDS» milliy taqdimotida yilning eng yaxshi ayol xonandasi nominatsiyasida g’olib bo’ladi. Bundan tashqari uning «Majnun va Layli» nomli kompozotsiyasi «Tarona» taqdimotida «Yil qo’shig’i» deb e’tirof etiladi.

2010-yilda «Sevginator-2» filmi katta ekranga chiqadi. Unda ham bosh qahramonni Manzura talqin etadi. Soundtreklarni ham o’zi kuylaydi. Shuningdek, 2010-yilda rejissyor Rustam Sa’dievning «Men bu men» filmi ham tomoshabinlar hukmiga havola etiladi. Manzura O’zbekistonda xizmat ko’rsatgan artist Rayhon bilan birga mazkur kartina uchun soundtrek kuylaydi. Bu ikki ijodkorning birinchi dueti edi.