LIMUZIN
LIMUZIN — goʻshti uchun boqiladigan qoramol zoti, Fransiyaning markaziy va jan.-gʻarbiy viloyatlaridagi goʻshtdor qoramollar zotlaridan tanlash va saralash asosida yaratilgan. Fransiyaning Limuzin tarixiy viloyati nomi bilan atalgan. Zot sifatida 19-a. dan maʼlum. Limuzin zoti mollari tez yeti-luvchan, muskullari kuchli rivojlangan, suyaklari ingichka, tusi qizil. Buqalari vazni 1000—1200 kg, sigirlari vazni 600—650 kg. Sigirlari serpusht. Yillik sogʻimi 1500—1800 kg. Buzoqlari sut emish davrida jadal oʻsadi va 8 oyligida tirik vazni 240 — 300 kg ga yetadi. Buzoq goʻshti olish maqsadida 3 oylik buzoklar 150— 170 kg ga yetganda soʻyiladi. Buqachalar goʻshtga jadal boqilganda 12 oyligida 500 kg vaznga yetadi. Limuzin har xil tabiiy xoʻjalik sharoitga yaxshi moslashadi. AQSH, Angliya, Vengriya, Germaniya, Rossiya va b. davlatlarda koʻplab tarqalgan. Belorussiya, Ukraina, Litva va b. da Limuzin zotidan boshqa zotlar bilan chatishtirishda samarali foydalanilmoqda. Limuzin zoti buqalari urugʻi Oʻzbekistonga 2002-y. dan boshlab olib kelinmoqda hamda Fargʻona va b. viloyatlar boʻrdoqichilik korxonalari va fermer xoʻjaliklarida kammahsul boʻlgan sigirlarni sanoat usulida chatishtirishda foydalanilmoqda.
Ensiklopediya.uz
LIMUZIN