Bazalioma haqida malumot

Bazalioma – teri bazal qavatining o‘sma kasalligi. Saraton kasalliklari ichida juda ko‘p uchraydi. Bu kasallik boshqa saraton turlaridan farq qilgan holda, turli a’zolarga metostaz yo‘li bilan tarqab ketmaydi. Faqatgina hosil bo‘lgan yuzaning atrofidagi to‘qimalarni yemirib, mahalliy tarqalib o‘sadi.

Bazaliomaga sabab sifatida

• Uzoq vaqt quyosh ostida bo‘lish;
• Yuqori harorat;
• Terining radiatsiyalanishi;
• Turli konserogen moddalarni ko‘p qabul qilish;
• Margmumishli anorganik birikmalar bilan ishlash kabilar ko‘rsatiladi.

Bazalioma

Ko‘pincha bazalioma yuz (burun qirrasi, lablar yoni, ko‘z burchaklari) va bo‘yin sohasida hosil bo‘ladi. Chunki terining bu qismlariga asosiy sababchi hisoblangan quyosh nurlari ko‘p tushadi. O‘simta och pushti yoki terining rangidagi tuguncha ko‘rinishida hosil bo‘ladi. Qorachadan kelganlarda esa tuguncha to‘qroq ko‘rinishda namoyon bo‘ladi. O‘simta ba’zan yaralanib, usti qonashi, chuqur, bitmaydigan va og‘riqsiz yaralar ko‘rinishida bo‘lishi mumkin.

Bazalioma kasalligini onkolog turlicha amaliyotlar qo‘llagan holda davolaydi. Bunda o‘sma tarqalgan soha, bemorning umumiy holati va uning tanlovi inobatga olinadi. Onkologning vazifasi o‘sma hujayralarini umuman qoldirmagan holatda, bemorning tashqi ko‘rinishiga ziyon yetqazmasdan olib tashlashdan iborat.

Davolashda jarrohlikdan tashqari, nur terapiya, kimyo terapiya, kriojarrohlik, elektrokoagulyatsiya usullari ham qo‘llanilishi mumkin.

Onkolog shifokorlar bazalioma rivojlanmasligini ta’minlash maqsadida quyidagi profilaktik tavsiyalarni berishadi. “Terini tik tushadigan yorug‘lik nuridan asrash, daryo, hovuz bo‘ylarida dam olishda soy joylarni tanlash yoki oftobdan himoyalovchi maxsus kremlardan foydalanish zarur. Bundan tashqari, organizmning radioktiv nurlardan zararlanishiga yo‘l qo‘ymaslik, uzoq vaqt zaharli va radioktiv jihatdan zararli bo‘lgan hududlarda bo‘lmaslik kasallik paydo bo‘lmasligiga asos bo‘ladi.”